Ramize Murtezi Shala u lind në Preshevë ku edhe kreu shkollën fillore dhe të mesme.
Ka të përfunduar Fakultetin Filologjik në Prishtinë në degën e gjuhës dhe letërsisë shqipe dhe ka kryer studimet master në Kolegjin AAB në Degën e Komunikimit Masiv dhe
Gazetarisë. Është nderuar nga Akademia Ndërkombëtare e Shkecave Sociale (Florida, SHBA, 2016) me titullin akademik nderi si dhe nga UAC School of Global Management (Florida, SHBA, 2016) me titullin profesor nderi. Me gazetari filloi të merrej që nga viti 2000. Për një vit punoi në gazetën e përditshme "Epoka e re", si gazetare që trajtonte temat që e preokuponin shoqërinë kosovare. Në vitin 2001 filloi punën fillimisht si moderator e lajmeve në Transmetuesin Publik të Kosovës - RTK e më pas edhe si gazetare hulumtuese dhe redaktore. Në punën e saj si gazetare hulumtuese, Ramize Murtezi-Shala, ka trajtuar shume raste të problemeve të ndryshme shoqërore në Republikën e Kosovës, duke filluar nga rastet e dhunës në familje, abuzimet seksuale me fëmijë dhe të mitur, diskriminimit gjinorë etj. Vlen të veçohet seria e emisioneve me rastet e përdhunimeve të luftës. Për punën e saj Ramize Murtezi Shala u shpërblye me dy mirënjohje; njëra nga Universiteti "Pjetër Budi" për guxim në gazetari si dhe në Festivalin Ndërkombëtarë për të Drejtat e Njeriut i organizuar nga KLMDNJ, për trajtimin e temave tabu të shoqërisë. Ky ishte flllimi i një pune tjetër. Në nëntor të vitit 2014 Ramize Murtezi-Shala fillon emisionin e titulluar "Tema" në RTK, ku çdo javë u ofronte shikuesve raste nga më të ndryshmet të shkeljeve të të drejtave të njeriut. Disa nga temat që ishin trajtuar në dy sezona nga ky emision ishin: Dhuna në familje, braktisja dhe adoptimi i fëmijëve, trafikimi i qenieve njerëzore, abuzimi i të miturve, femrat jotrashëgimtare të pronës, nga dhuna në vrasje, martesat e detyruara, rastet recidiviste, përdorimi i drogave, dhe përdhunimet e luftës.
Ramize Murtezi Shala është autore edhe e dokumentarit "Ulërimë në heshtje", në të cilën disa gra flasin për përvojën e tyre të hidhur gjatë luftës, si dhe për herë të parë në Kosovë, në këtë dokumentarë edhe një burrë flet për përdhunimin e tij gjatë luftës. Pas kësaj pason dokumentari tjetër vetëm me rrëfimet e burrave të përdhunuar. Për herë të parë audienca kosovare kupton se në Kosovë ishin përdhunuar edhe burrat. Nga viti 2016 e këndej, Ramize Murtezi Shala është redaktore përgjegjëse dhe moderatore e emisionit hulumtues në RTK të quajtur "Udhëve", ku trajtohen tema kundër krimit të organizuar, korrupcionit, kundër radikalizmit, tema të ndieshme politike etj.
Çmimi:
800 Lekë