Kështjella Blu. Ëndrra e një gruaje ( Published by: OMSCA-1 in 2017 )

---

Ky roman është konsideruar si një nga veprat për të rritur të autores kanadeze L.M. Montgomery. Popullariteti i këtij romani duket qartazi në ribotimet e tij të shumta. Libri është përshtatur dy herë: në vitin 1982 për një pjesë të suksesshme muzikore në Poloni dhe dhjetë vjet më vonë dramaturgu kanadez Hank Stinson ka realizuar një version tjetër të tij. Valencia Stirling është njëzet e nëntë vjeçe, e pamartuar, dhe ka jetuar tërë jetën me familjen e saj në një rrugë të qetë, në një shtëpi të vogël dhe kurrë nuk guxonte ta kundërshtonte nënën e saj autoritare, gjithashtu edhe hallën që jetonte me to. Papritmas ajo merr një letër tronditëse dhe vendos se shumë gjëra duhet të ndryshojnë. Për herë të parë në jetën e saj, ajo bën pikërisht atë që dëshiron, dhe thotë pikërisht atë që mendon. Në fillim familja e saj mendon se ajo ka humbur mendjen. Por shpejt Valencia zbulon në rrugëtimin që ka nisur plot të papritura dhe aventura, që ajo as që i kishte menduar kurrë të ishin të mundura. Valencia gjithashtu gjen dashurinë e saj të vërtetë te Kështjella Blu, për të cilën ishte e sigurt se kishte ekzistuar vetëm në ëndrrat e saj...