Luisi do të donte që t’ia fshinte me të puthura këto hije të mvrenjtura nën sytë e saj dhe ta mbante Olivian në përqafime, ta ledhatonte dhe të fliste se sa e mrekullueshme ishte ajo. Sepse gruaja gjithnjë duhet ta dijë se mrekullohen pas saj. Por ai po këtu nënqeshi nga ëndrrat e tij. Ai ishte një shtegtar meksikan, që e zotëronte mjaft mirë revolverin me qëllim që të mbijetonte në këtë botë të egër. Kurse ajo ishte vajza e bankierit dhe, duket, duhet të bënte zgjedhjen mes dy pronarëve më të pasur të tokave të qarkut. Nuk kish asnjë shans që miss Olivia Miliken ta mësonte ndonjëherë emrin e tij, pa folur pastaj se dikur ai do të mund t’i pëlqente asaj.

Fejt, endej pyllit duk vështruar sipër dritën e diellit, të përthyer tek kurorat e blerta të pemëve dhe mendonte se aroma më e mrekullueshme i përkiste Grej Rujardit. Ndjenjën e fshehtë ndaj tij, Fejt e ruante thellë në zemrën e saj vajzërore. Nuk arrinte ta takonte shpesh Grejin - së largu, natyrisht, - gjatë ardhjeve të tij të herë pas hershme në qytet, po për hir të këtyre çasteve të shkurtra ia vlente të jetonte. Kur deri tek ajo arrinte zëri i tij i burrëror dhe i fortë, Fejt dridhej e tëra nga lumturia. Kurse sot ajo ishte afruar me të aq, sa kishte arritur të ndiente erën dhe aromën e trupit të tij. Madje, më tepër se kaq, ai e kishte prekur atë! Ende Fejt i rrotullohej koka, ndonëse ai çast magjik kishte kaluar tashmë.

Të duash një burrë që e kalon gjithë jetën në udhëtime, është krejtësisht e mundur. Por të duash një njeri që tërheq drejt vetes si magnet rrezikun, për një gjë të tillë nuk është e aftë çdo grua. Policët, zjarrfikësit, naftëtarët, të gjithë këta kanë profesione të rrezikshme. Por të paktën ata jetojnë hapur, nuk fshihen nga askush. Ata ekzistojnë në botën reale. Ndërsa Xhoni gjithmonë shtiret, luan rolin e domosdoshëm për të kryer detyrën e radhës. Ai gati e ka humbur vetveten dhe gjithë kohës fshihet nën emrin e tjetërkujt. Ajo nuk do ta marrë vesh nëse është gjallë apo ka vdekur, dhe, në qoftë gjallë, nëse do të kthehet tek ajo apo jo. Ajo nuk mund të dashurojë kështu. Po as nuk mund të jetojë kështu.